Header Ads Widget

Ticker

6/recent/ticker-posts

திருக்குறள் நீத்தார் பெருமை அதிகாரம் 3 - விளக்கம்

திருக்குறள்

அதிகாரம் - நீத்தார் பெருமை

Thirukkural Neethar Perumai - திருக்குறள் நீத்தார் பெருமை


21. ஒழுக்கத்து நீத்தார் பெருமை விழுப்பத்து 
வேண்டும் பனுவல் துணிவு.

பொருள் :

மற்ற உயிர்களுக்கு சேவை செய்ய வேண்டும் என்பதற்காக தங்களின் ஆசைகள் எல்லாவற்றையும் துறந்து வாழ்வதையே ஒழுக்கமாக கொண்ட துறவிகளை நாம் பாராட்டி பெருமைப்படுத்தி எழுதுவதே நூலின் தகுதியாகும்.

22. துறந்தார் பெருமை துணைக்கூறின் வையத்து
இறந்தாரை எண்ணிக்கொண் டற்று.

பொருள் :

உலகத்தில் இதுவரைக்கும் பிறந்து இறந்து போன மனிதர்களின் அளவை எப்படி நம்மால் கணக்கிட முடியாதோ, அதுபோலவே மற்றவர்களுக்காக வாழ்வோரின் பெருமையை நம்மால் அளவிட்டுச் சொல்ல முடியாது.

23. இருமை வகைதெரிந்து ஈண்டுஅறம் பூண்டார் 
பெருமை பிறங்கிற்று உலகு.

பொருள் :

நல்லது கெட்டது அனைத்தையும் தெளிவாக தெரிந்து நன்மை செய்வதையே தங்கள் முழு குறிக்கோளாக கொண்ட துறவிகளின் பெருமையே உண்மையான பெருமையாக விளங்குகிறது.

24. உரனென்னும் தோட்டியான் ஓரைந்தும் காப்பான் 
வரனென்னும் வைப்பிற்கோர் வித்து.

பொருள் :

பல வழிகளில் வரும் அடக்க முடியாத ஆசைகளை தங்கள் தெளிவான அறிவினால் அடக்கி, மன வலிமையுடன் வாழ்ந்துவரும் பெரியவர்கள் தெய்வ நிலையில் வைத்து வணங்கத் தகுதி வாய்ந்தவர்கள் ஆவார்கள். 

25. ஐந்தவித்தான் ஆற்றல் அகல்விசும்புளார் கோமான் 
இந்திரனே சாலும் கரி.

பொருள் :

தேவர்களுக்கெல்லாம் தலைவனான இந்திரன் ஆசைகளை அடக்க முடியாத காரணத்தால் ஒரு முனிவரால் சபிக்கப்பட்டார். இதுவே ஆசைகளை அடக்கிய  துறவிகளின் வலிமைக்கு சாட்சியாகும்.

26. செயற்கரிய செய்வார் பெரியர் சிறியர்
செயற்கரிய செய்கலா தார்.

பொருள் :

தங்கள் மனதின் வலிமையால் நினைத்த காரியங்களை எல்லாம் செய்து முடிப்பவர்கள் பெரியவர்கள். அப்படி செய்ய முடியாதவர்கள் சிறியவர்கள்.

27. சுவைஒளி ஊறுஓசை நாற்றமென ஐந்தின் 
வகைதெரிவான் கண்ணே உலகு.

பொருள் :

உடல் உணர்வு, வாய் உணர்வு, கண் உணர்வு, மூக்கு உணர்வு, காது உணர்வு என்னும் இந்த ஐந்து  உணர்வுகளும் நம் மனதை கெடுக்கக் கூடியவை.  இந்த உணர்வுகளைக் கட்டுப்படுத்தும் வலிமை உடைய பெரியோருக்கு உலக மக்களெல்லாம் கட்டுப்படுவர்.

28. நிறைமொழி மாந்தர் பெருமை நிலத்து
மறைமொழி காட்டி விடும்.

பொருள் :

பெரியோர்களின் சொற்கள் நமக்கு அதிக பலன்களைத் தரக்கூடியது என்பதற்கு சாட்சியாக அவர்கள் மூலம் நமக்கு அருளப்பட்ட புனித நூல்களின் வசனங்கள் விளக்குகின்றன.

29. குணமென்னும் குன்றேறி நின்றார் வெகுளி 
கணமேயும் காத்தல் அரிது.

பொருள் :

மற்றவர்களுக்கு நல்லது செய்வதையே தங்கள் குணமாக கொண்டு வணங்க தகுதி வாய்ந்தவர்களாக வாழும் பெரியோர்களின் மனம் புண்பட்டால், வேதனையில் அவர்களின் சொல் தடுக்க முடியாதபடி அதன் பலனை கொடுத்துவிடும்.

30. அந்தணர் என்போர் அறவோர்மற் றெவ்வுயிர்க்கும் 
செந்தண்மை பூண்டொழுக லான்.

பொருள் :

உலகில் உள்ள எந்த உயிருக்கும் துன்பம் செய்யாமல் அருள் உணர்வுடன் நடந்து கொள்வதே அற உணர்வு என்றால், நன்மை செய்வதையே குறிக்கோளாகக் கொண்டவர்கள் எல்லோருமே அந்தணர்கள் ஆவார்கள்.

Post a Comment

0 Comments

.